Sport met fossiele verbraandingsmotoren zin ‘k hartstekke tegen. Ik veende Formule 1 ne volstrekt oaverbodige sport. Knoer-oolderwets ook a’j met ’n autootje duur de geluidsbarrière hen weelt goan. Toch vervleuk ik Max Verstappen neet. Aandere leu hooft neet dezelfde bezwoaren te hebben tegen Formule 1 as ikke. Zol wal mooi wean natuurlijk, mear dan mu’k ze oavertugen. Mear dät oavertugen wordt niks as ik ze tot in het deepste van de helle vervleuke, kleinere of votzette as oerstom of duurgezakt.
Ik zir tegenstaander van elektrische fietsen en Aixams vuur jongeren oonder de 21. Ik veende de dierenambulance toppunt van westerse decadentie. Mear ik gooie ze neet met steender en van miej hooft dee vriejwilligers neet in ne TBS-inrichting en ook neet verplicht op woarkvakaantie op de stroatoarme noord-oever van de Gambia-rivier. Ze mangt voloet doon wat ze zelf nuttig veendt. Ik zir ook tegen bladbloazers, mer een buurman met dit volstrekt oaverbodige gereedschap zeg ik vreandelijk dagtied. Hee hef recht op ziene eagen ofwieking, ook al is dät nen bladbloazer. Ik zir mordicus tegen dichte liekkisten met nen plezerigen foto op ’t deksel biej condoleances. Dät veend ik gin ofscheaid nemmen. Tóch boycot ik dee ofscheaidsceremonies neet. Ik zegge doar gin obscene dinge oaver en ik preante miezelf alverdan in dät de leu zukke dinge kats zélf mangt beslissen. Het is heur leaven en heuren dood. Eagenlijk zin’k ook tegen 100 kilometer op de snelweg, terwiel ik weet dät hard jagen slecht is vuur ’t milieu.
Ik zir neet better as aandere leu. Mear ik heb Maatschappijleer & Staatsinrichting had. Wiej hebt allemoal oonze meaningen. Dee ma’j in de praktijk proberen te brengen. Spant oe mear in vuur dreagvlak. Aandere leu magnt dät ook. Aandere leu hooft heelmoals neet per sé hetzelfde te veenden as ikke. Dät neume wiej democratie. En dan verteelden den halfzachten maatschappij-leraar hoe dät allemoal woarkten. “En,” zea hee, “ook als je je zin niet krijgt, hou je steeds aan de spelregels, net als in het verkeer. Blijf fatsoenlijk en probeer het opnieuw.” Aandere leu met aandere meaningen doodscheten, verbaal vermoorden, as onweardig-zielige schepsels votzetten, as achterlijk besteampeln as ze oew meaning toevallig neet deelt heurt doar neet biej. Stelt oe toch vuur dät iederene verplicht mut geleuwen an de reptielenreligie van Baudet!
Elsschot zea: “Maar doodslaan deed hij niet (..) want daar staan wetten in de weg!” Doo’j dat tóch; dan krie’j ne boote. Zó seempel is ‘t. Dät veendt gin enen Nederlaander gek. An dee seempele fatsoensregels hove wiej oons allene mear te hoolden. Wat zal ’t er stille worden in de (social) media.
Gerrit Dannenberg
