Joaren zin ik al bie et muziek. Dan bouw iej vreandskoppen op. Ne egene kultuur. Standaardgräpkes woer’j bie hadden mutten wean. Dan kö’j an mekoars wieze van spöllen nog vernemmen as iemand ’n kop verkeerd hef stoan. Tegelieke kö’j dan met zelfs mer een händkevol harsencellen al noagoan dat et bie andere clubs ook zo geet.
Ook binnen de muziekwearld he’j ne Champions’ League, Drum Corps International. Stelt oe vuur: ne oard fanfare, mer dan an de doping. Dee repeteert 12 uur op nen dag, goat moanden op toer en a’j der bie wilt mu’j eerst auditie doon. Ook in Nederland trekt dat völle fanatiekelingen, dee as zelfs abonnementen op de livestreams hebt en ’s nachtes in Augustus wakker blieft um de finales te kieken. Sommigen doot zelfs spoaren um der hen te vlegen en met te doon.
Greuts zin ik bievuurbeeld op ‘onzen’ Simon, den as vanof de Bornse Harmonie een invalseizoen metdeed bie drumfanfare Wilhelmina Riessen, et drumcorpsvirus kreeg en verleden joar bie de DCI Mandarins duur de audities köm.
Tuurlik he’j in dee topclubs favorieten in. Ik vinde bievuurbeeld de Cavaliers gaaf. Vuural umdat öar loopwoark zo strak ik mekoar zit da’j metene öaren biename ‘The Machine’ begriept. Et is mangs net nen leavenden kaleidoskoop. En onderwiel maakt ze der nog passende (en meuilike) muziek bie ook.
Mer dat wil neet zeggen dat mie neet et hennenvel oaver de rugge löp van bievuurbeeld et Phantom Regiment, met öaren altied klassieken inslag. Of da’k et explosieve Carolina Crown neet magge lieden of de BlueCoats. Heel mangs kan’k zelfs dee pochebazen van de Blue Devils nog anzeen, as ze es neet van dee onnoavolgboare piepknortuutmuziek maakt.
Oeteandelik goat ze allemoal vuur de beste punten en maakt ze muziek op et allerheugste niveau. Of ze noe een blauw of rood päkken an hebt.
Doarumme snap ik dee donderieje bie ’n vootbal ook nooit. Dat volwassene kearls neet inzeet dat ze alle joaren heupe met centen noar een kommercieel bedrief henskoevet. Vuur kleare van dat bedrief, vuur seizoenskaarten, vuur ’n beer in et stadion…
Mer nog et allerdomste vind ik dat dee kearls dan anderen de köppe inhouwt as dee tovallig in kleare van een ander bedrief loopt. Stelt oe es vuur dat anhangers van de Dirk van de Bokse, kats in et rood, op de voest zint egoan met “dat pisvolk van de Jumbo, met öare nichterige gelle klearkes.” Umdat de ene ploge vakkenvullers et spul rapper vuur mekander had as de andere ploge. Klinkt dom? Is et ook ja.
De hoge hearen lacht zik de volden oet de bokse. Onderwiel klingelt öar de centen in ’n tuk. Da’s echte clubleefde.
Martin ter Denge
