Nen flap-column kan oe toch an ’t deanken zetten. Pianiste Daria van den Bercken schreef vergangen zoaterdag in de NRC nen column met nen niejsgierigmakenden titel: “Kunst is net zo belangrijk als sport”. Een oondertitel was dreks dikke onzin: “Muziekeducatie is veelal geschrapt. Met sport hoef je dat niet te proberen.” Nou, dan wee’j al wat ‘r koomp. Mear a’j beweart dät de sport in het oonderwies de ofgelopen joaren on-angereurd is ebleven, dan he’j toch heel wat emist. Het vak lichamelijke opvoeding – vroger gemmestiek – is biej de snelgreujende lerarentekorten al joaren nen sloetpost biej ‘t lesreusters dichte-maken. Dus ook doar al heel lange kwoalijke gevolgen: te völle dikke leerlingen en ne slim verslaterende belangstelling vuur de sport.
Mear Van den Bercken beweart ook dät topmusici en topsporters nen hoop ’t zelfde hebt. Heel slim woar natuurlijk. Ze mutten joonk beginnen, ze haalt het beste oet zichzelf, mutten der hard vuur woarken én der geet ne hele goo vuurbeeldwoarking van oet noar de jongere generatie. Noh jea: muziek en sport brengt ontspanning, stelt oe in stoat wier fris noa te deanken en brengt oe in eavenwicht. Genog readen um doar nooit op te bezeunigen, want dan wordt ‘r neet mear noadacht en krie’j onbalaans in de samenleaving.
’n Zetje terugge schreef oold-PvdA-minister Ronald Plasterk in de Telegraaf. Joa, de Telegraaf? Hoe besteet ‘t !? Mear vruit. De strekking was dät de PvdA vroger opköm vuur de woarkende klasse en in ruil doarvuur moch de PvdA nen moojn ceant spenderen an cultuur, sport en dee dinge. Het kon wal ’s weazen dät de maatschappij van toen better in eavenwicht was as rechtevoort. Mear de woarkende klasse hef de PvdA al lange in-eruild vuur de SP of de PVV. En jea, dan wordt ‘r vanzelf ook heel makkelijk gin geeld mear estökken in vakken als lichamelijke opvoeding, het muziekoonderwies én de creatieve vakken op de scholen. Tuurlijk leupen in de scholen ook te völle gefrustreerde en oetgebluste leraren-creatieve-vakken roond en doar gong zekers ook gin werving van oet. Mear viej zeent in nen spiraal noar dealten trechte-kömmen. En seends Pim Fortuyn wete wiej allemoal hoarfien woer ’t an lig. En dan toch maakt ze den doevenöarigen Atje Kuiken fractievuurzitter van de PvdA in de Tweede Kamer. Wal één vuurdeel: het fusievroagstukke met Groen Links löst zich zo vanzelf op. Nog een joar of wat Atje Kuiken en dan vaalt ‘r heelmoals niks mear te fuseren.
Gerrit Dannenberg
