In de papieren zoaterdagkraante van Tubantia mear leefst 10 bladzieden sport. Heel begriepelijk, want EK en Tour de France. In de digitale Tubantia stoot ik per oongeluk op de journalistieke aardverschoeving van de eeuw: noa de zommervekaansie geet in de Hof van Twente nen specialen roadsverslaggever gangs. Dissen journalist krig van de gemeente betaald um oaver de plaatselijke politiek te schrieven in het Hofweekblad. Ne schandalige ontwikkeling, want dit gebuurt umdat Het Dagblad Tubantia neet mear schrif oaver de plaatselijke politiek.
Dit besloet van de Hof van Twente geet duur ne principiële greanze. De gemeente betaalt journalist Marcel Tettero vuur het maken van roadsverslagen. Tettero krig ginne strakke schriefcode van de gemeente met, mear hee kan gewoon de roadsvergaderingen versloan wat’e aaltied dee toen hee nog vuur Tubantia woarkten. Mer wee ’t oe loon betaalt, doar hool iej aaltied rekkening met. Onwillekurig. Wee zal bieten in de haande den ‘t oe te vretten gef.
Readen van disse duurbraak: onwil van de gewone kraanten um niks mear an gemeentepolitiek te doon. 10 bladzieden sport, vear van ’t hoes, zeent belangrieker as democratie dichte biej de dure. Politiek raakt de leu neet, zeg de kraante. Tjea…flathoge weendmöllen, domme verkeersregels, verwoarloosd stroatgreun, onweanselijke weenkeltieden, verheuging van huzenbelasting, wonningbouw wat ontbrek, aszielzeukers neust de dure, onlogische wegumleggingen en vuural ook leugen en bedrog, neet doon wa’j beloaft en weendbuulgedrag… Het zol de leu in de stroaten neet raken…? A’j der neet oaver schrieft in elk geval neet! De pers was aaltied ’n waakhoond van de democratie. Dat was een principe. Wat blif doar van oaver? De waakhoondfuctie van de kraante is versmald tot het stelselmoatig dement-verkloaren van Gerard Sanderink en het maximaal inzetten van het woord “zelfverklaard” vuur cyberexpert Rian van Rijbroek. A’j het mear vake genog herhaalt, hef zelfs nen gewonen rechter doar niks mear an too te vogen. Hoo völle leu zollen dóár non verestig wakker van liggen? Wat löp de democratie vuur schade op at Sanderink de oren löt hangen noar ‘n niej vriendin?
Sport is machtig belangriek vuur heel völle leu. Mer de plaatselijke politiek ook. Det loa’j neet oaver an nen duur de gemeente betaalden roadsverslaggever. Dát is een principe. In de NRC dreigden nen leazer dat hee de kraante zol opzeggen as ze der gin nietje in doot. Dát zeent nog eens principes. Mear ne kraante den niks an de plaatselijke democratie dut, schöt vear oonder dee nietjes duur.
Gerrit Dannenberg
