Sport met deers veen ik neet per definitie verkeerd. A’j de deers tenminste loat doon woer ze good in zeent. Het is gin bezwoar um pearde zo hard meugelijk te loaten draven oaver ne vlakke grösbane. Vuur weendheunde geeldt dat ook. Postdoeven terugge loaten vlegen noar ’t hoes; ook neet verkeerd.
Het wordt al meender a’w oonze meanselijke slechtigheaid inschakelt. Pearde doo’w spuiten met pepmiddeln dee de snelheaid opvoert. Blessures veroorzakende hoof-iezers, terwiel der prima peardeskone zeent. Postdoeven loa’w eerst een nöst met jongen kriegen umdat ze in zonnen weduwnaarsvloch nóg mear andrang hebt um in ’t hoes te kommen. Met disse dinge zi-w dus kats oet de bocht evlöagen.
Toen de meeste leu nog op ’n boer woonden, leafden wiej nöast de deers. Heunde en katten hadden volop de ruumte. Een hoond oonder de kökkentöafel vuur de ettensresten en de bewaking. De katten zoonder gekmakend haalsbaandbelke vöngen de rotten en de muze vot. Totaal gin probleem: deers inzetten um angeboren eagenschappen.
En het geet heelmoals verkeerd met stierengevechten, gaans-trekken, veenken de oogn oetbraanden um ze nóg meujer te loaten fluiten. Zwientie tikken. Zangliesters in hele kleane köwkes in bloodhete kamers. Loat ‘t eaven op oe inwoarken: ene parkiete…heel joonk oet het nöst, wordt groot-ebrach zoonder aandere veugel en krig zónne persoonlijkheaidsstoornis det’e wil poaren met een spegelke! Enen kanarie in de kamer den ’t geet fluiten op de meest on-kanarieachtige momeanten. Ene papegaaje in de kamer den ’t zich van verveling de vearen oetplukt. En dan mut den vogel ook nog de gekste meanselijke strotklaanken noadoon en met völle fantasie mu’j doar dan wöarde oetdestilleren woer de papegaaje totaal gin papegaaj-achtige gedachten biej hef. Mangs knipt ze dee dikke zoadvretterstonge in um een vogel nóg meanselijker te loaten sprekken (??), fluiten (??), krassen. Hoe haal iej het in oew meanskenharsens!?
Weant earlijk: nen hoond in de kamer en dan mear deanken dat het deer plezeer hef duur um 3 keer daangs an de liene oet te loaten. Heunde duur inteelt van het ras votfokken dat ze allene met de keizersnee geboren köant worden. Of ne vacht kriegt met zúkke lange höare woer ze al geent duurhen köant kieken. Zogenaamde skootheunde dee finaal plat-aajd wordt. Visken met kaansloze weerhöake en dat verestig ook nog hengelspórt neumen. Zéggen de’j deers een good leaven bezorgt, terwiel het allene mear geet um oew eagen kleanmeanselijk plezeer. Kiekt noar al dee katten met één oge, katten zoonder start of katten dee zelfs nooit boeten komt.
Ik weet neet zeker of Dion Graus en dee PvdD-mevrouw ruggegroat genog hebt hier met gangs te goan.
Gerrit Dannenberg
