A’j met postdoeven doot of weendhoonde, dan heur iej officieel biej de sporters. Mear het hoolden van veugel, heunde of tropische viske is niks mear as ne leefhebberieje. Sportleu stelt vuural zichzelf op de proef. Bekwoamt zich in eur sport en probeert as persoon zo good meugelijk te presteren. Of iej goat noar de sportschole um oew fysieke greanzen op te rekken. Mear a-j deers hooldt, doo-j juust wat met aandere leavende weazens. Dee loa-j wat doon terwiel a’j zelf fysiek boeten schot blieft. Komt oew postdoeven terugge-vlegen van Barcelona, dan kö-j zelf in de hangmatte blieven liggen. A-j schöape hooldt, hoof iej doar zelfs niks an te lieden. Aandere leu ook neet. Zélfs a-j nen hoondenleefhebber zeent, hoof de mede-mens doar gin last van te hebben. At dee hoondenleefhebbers tenminste de stront netjes opruumt en de heunde an de liene hooldt.
Totaal aanders is ‘t met kattenleefhebbers. Hoeskatten heurt neet in oonze natuur. Net zo min as poedels en pitbulls. Mear dee mu-j vuur boeten ook an de liene hoolden. Ne gewone hoeskatte is een gloepens intelligent deer. Oaverdag slöp’e lange uren en ’s oavends wil’e bitter gearne noar boeten hen. Op jacht! Dät hef’e in ’t gebleute.
Vearder lustert ne katte vuur ginnen meter, hee geet zienen eagnen gaank en beschouwt oew hoes as een veerstearn-hotel woe-j dag en nacht trechte-köant zoonder inchecken en oetchecken. De kattenhoolders bewéárt wat aanders, mear zelfs zee hebt nóg meender binding met ’t hoesdeur as leu met nen gooldvis. Um dät te verdoezeln, doot ze oaverdreven romantisch oaver het volstrekt onberekkenboare en onangepaste gedrag van ne katte:
“Oh kijk hem eens lui liggen in het zonnetje!”
“Moet je die arrogante blik zien van die hooghartige dame.”
“Ze trekt zich nergens iets van aan en blijft gewoon doorgaan met de vulling uit het bankstel halen.”
Ook wat ne löslopende katte vuur boeten oetvret, wordt van alle kaanten good-eproat. Ook al koomp’e in ’t hoes met nen leavendigen moes. Of as’e in tuin ne geteling biej de vearen hef. “Ja, dat doen ze…” Mear een deer dät aandre deers zo mear doodmaakt – zelfs met grote blikke Whiskas achter de kneupe – kan natuurlijk neet löslopen.
Dus mut ne katte an de liene. Dät wil zon deer natuurlijk helemoals neet. Dus is ne katte binnen de bebouwde kom totaal ongeschikt as hoesdeer. Loa’w het kattenwelzijn bevordern, dus allene katten too-stoan op gemengde agrarische bedrieven. Een onmiddellijk totaalverbod op de kattensport is in het belang van de katte en van oons allemoal. Doar kan ’t geen meanske met oneens wean.
Gerrit Dannenberg
