Echt, as wiej et vuur et zeggen hadden, non dan zo’j et nog es metmaken. Dan ha’w nooit gin oorlog mear. Wisse, as alleman etzelfde dech, löp der niks in et honderd. En loa’w in Twente noe precies net et juuste slag volk wean wat allens in een keer begrip, zonder oetleggen. Dat leste mut iej ook geheels neet proberen, want dan dring iej oewe zeenswieze op en doar he’w niks an want dat van ons was al et beste. En dat blif et ook. Want wiej zint wal zo geweldig, an ons mankeert helemoal niks.
Iej mut et zo zeen: mien bestevaar zien vaar hef duur dat ruutje kekken, mien bestevaar hef duur dat ruutje kekken, mien vaar hef duur dat ruutje kekken, IK hebbe duur dat ruutje kekken, mie ducht, dan kön iej ook wal duur dat ruutje kieken.
Bie ons is allens nog bie et olde. En da’s vake toch wal et beste. Zeektes en geveul doo’w neet an. En Noaberskop, och jongs, zo’n mooi spul. Wat zea’j? Fryske Mienskip? Nee jong, da’s kats wat anders. Haalt et neet bie onzen noaberskop. En doarbie, da’s Frees. Dat Mu’j Neet Willen, Dat Mu’j Neet. Kan nooit wat worden, zal et ook nooit.
Wiej kuiert ook nog es et beste plat, vuural doar in Böaningen boetenof. Kö’j nit tegenan en dat kö’j neet. Drents? Lik der neet op. Achterhooks. Mu’j neet willen. Sallanders? Hebt der niks van begreppen, haha. Och boh nee, dan kö’j et nog better loaten.
Der is niks in dit leaven zo fein en woarlik Twents as Twentse Twenten (vuural doar in Böaningen) dee in good Twents Twents kuiert oaver de Twentse zaak. En a’j neet in echt Twents Twents oaver de Twentse zaak kuiert mer oaver gewone alledaagse dinge, dan is dat verspilden oasem en mu’j oe ofvroagen o’j wal echt zo Twents zint. Want der is niks zeuter an Twentse oren as Twentse Twenten dee as in good recht Twents-Twents oaver Twentse zaken kuiert.
Ikzelf zin wal zo Twents, van et böavenste höarken op ‘n kop töt et leste neageltipken van ’n kleinen tee. Tegelieke een zwoar lot, want ik zin ook ’n lesten woarlik Twentsen Twent op disse wearld.
Feitelik hef der mer ene op de wearld geliek en dat zin ik. Mer Twents duurgeven hef toch gin zin, want de kinder zölt nooit zo onmundig Twents worden as ik ooit zin ewest. Iedere poging um Twents te kuiern van anderen as ikke is meteen ne zwoare beleadiging. Feitelik is et óf good óf niks en good geet oe toch neet lukken. Dus loat mer wean. Nit mear as logisch dat et verdwient. Mooi zo.
Martin ter Denge
