De trainers van de jeugdteams biej ’n voetbal leart de möage zoonder peuntentelling voetbaln. De universiteiten schaft het slagen met cum laude of. Dàt is de tied van rechtevoort: alns wat ook mear ’n klean betje boawen het meejveeld oetstek, mut dreks glad worden emaakt.
Ik zir biej miejzelf wal eens noa-egoan hoe’k doar vroger teegn-an keek. Met voetbaln zat ik nooit biej de besten. Ik kon hard genog lopen, mear det is netuurlijk nog gin voetbaln. Folkert Veelten oet Eanter kon machtig voetbaln, mear hard lopen dee-r hee nooit. Zukke dinge he’j van oezelf heel gaauw duur; iej weet al heel vlot van oezelf da’j ginnen voetballer zeent. Kan miej neet herinnern de’k doar ooit troanen um eloaten hebbe. Gevolg: ik zir nit biej een voetbal egoan en dàt was in het belang van iederene den wál kon voetbaln.
Met visken gong ’t miej trouwns net zo. Wal ’s probeerd, mer ik heb nog ooit enen vis an ’n hoakn esloan. Gevolg: ik zir gin lid ewörden van de visclub. En ook hiervuur geeldt: ik heb dàt nooit slim eveunden en ook dàt was in het belang van alle echte hengelsportleefhebbers. Ik mur wál zeng det ze oons in ’t hoes altied wál learden ummegoan met dinge dee’j nit good konn. Doar wordn viej nit op of-erekkend, want – zeaden ze – der blewen nog genog dinge oawer woe’j wál wat in konn doon. Noadeanken en relativeren. Alns in zin verhoolding zeen. Alns is betrekkelijk.
Ook ciefers en getaln. Wat is nou ne 8 zoonder nöadere oetleg. Of ne 10. Wee dee 10 met twee vingers in neuze haalt is vuur miej niks mear as ene den met völle knoojn marteln ne zeuwne biej mekoar zweet. A’j doar rekkening met hooldt, is der niks verkeerds an studeanten dee cum laude slaagnt.
Iej hoownt oe met ne zesse niks meender te veulen, vuural nit a’j doarnöast volop de ruumte hebt enömmen um van het studeantenleaven te genieten. Ik kan oe wal verteln de’k lewer nen hoesdokter hebbe met mensenkennis en geveul, dan as nen dokter den ’t alle meanselijke kwoalen mét de latiense naams in 3 minuten op kan zeggen. Nit degenne den ’t beste schaken kan is automatisch nen grootmeaster. Het is altied ne optelsomme van factoren dee ’t oe een top loat bereiken. Alns is betrekkelijk. En a’w doar mekoar met leart ummegoan, mangt de peuntentelling en het competitie-element biej ’t jeugdvoetbal bliewen en magnt studeanten ook met lof bliewen slagen.
Peuntentelling biej vermageringsdieetn mutten ze wál dreks ofschaffen. Dàt woarkt vuur ginnen meter, want nen slagroomtaartn is mear 6 peunten.
Gerrit Dannenberg
