A’j een betje good gebekt zeent en mooie powerpoints köant maken, dan kö’j gooldgeeld verdenen an het geven van management-trainingen. Natuurlijk neum iej dat seminars of hei-sessies of benen-op-tafelmeetings. Iej streujt een betje met strakke termen as piketpaaltjes, platte organisatie, management-by-walking-around en laagdrempeligheaid. Iej maakt nen moojn documentatiemap, ne gratis penne der biej woe’j ook ‘n touchscreen met köant bedenen. An ’t eande een glemmig certificaat en ’t is trechte. Het meeste möaite is nog um oew taalgebroek met de tied met te loaten goan. Mear doar is genog te veenden op LinkedIn.
Vuural de leste tied is het begrip “zelfsturende teams” de nieje mode. Dit past heel good biej ne platte organisatie. En hét grote succes van dizze oetvinding is natuurlijk da’j gin deure managers hooft te betalen.
Benaamd in de zorg en biej de gemeenten zeent ze de leste tied volop gangs um van elke ofdeling zelfsturende teams te maken. En met nearige ambtenaren kö’j nen helen eande kommen. Toch zee’j in de praktijk dät zelfsturende teams juust ofremt in plaatse van slagveardig haandeln te bevordern. De ambtenaren kiekt mekoar an. A’j allemoal verantwoordelijk zeent, is der gin ene fealijk echt verantwoordelijk. Want doar kan altied wat verkeerd goan. En wee is dán verantwoordelijk. Wee krig de scheuld? Iej allene? Want iej hebt de beslissing enömmen. A’j nen baas hebt den extra betaald wordt en doarvuur ook de eindverantwoordelijkheaid dreg, dan kan den baas de kastanjes oet ’t veur halen. Mear a’j in een zelfsturend team allemoal verantwoordelijk zeent, dan mu’j alns vuuroet groondig onderzoch hebben. Aanders begin iej der neet an. Gevolg: een heel lang vuurtraject en doarnoa nóg gin zekerheaid dät ’t duurgeet. Zo komt der hele vrachten zaand in de mesiene en maalt ambtelijke molens nóg langzamer.
Sprekwoorden zeent heel snel versletten. Ze wordt ook heel vake gebroekt, umdät ze ook zo woar zeent. Ik zegge ‘t doarumme nog mear eens: twee kapiteins op één schip, dät wil nit. En dan zol nou een heel team met allemoal kapiteins zo mear zichzelf können besturen? Stel dät ’t woar was: het Nederlaands elftal zoonder Louis van Gaal; Oranje as zelfsturend team. Ik heb gin verstaand van voetbal, mear dät wordt natuurlijk niks. Ene mut vuurop goan, ene mut zeggen watvonne kaante at ’t op mut, ene mut nen groten bek opzetten tegen de pers en ene mut de scheuld kriegen at Oranje verleest. Zo heurt dät!
Gerrit Dannenberg
