Wat leu, hè. Dee zo’j nen cent doon. Met noadruk op ‘zo’j’. Want as iej et echt zollen doon, dan gungen ze klagen dat et mear nit was. Mer a’j ze niks doot, is et ook wier nit good. Woer et dan op dale kump is dat der dus mer helemoal niks gebuurt. En doar hebt ze dan ook wier wat oaver te nöalen. Want et is nit good of et deugt nit.
Zoer doon is ne keuze. Iej könt der vuur kiezen um der et beste in te zeen. Of iederene der bie halen um op ne hele witte mure net dee ene dode mugge an te wiezen en dan te zeggen dat et hele hoes nit deugt. Terwiel as et in et grote geheel mer een klein stipken is. Iej zollen et geheels nit zeen as nums et har ezegd. Iej köant ook blie wean dat iemand dee mugge plat hef ehöwwen, zodat wiej der gin last mear van hebt. Dit is vuur sommigen alwier tevölle zweverige beeldsproake. Wat een genöal, zegt ze dan. Mer hee dut et toch mer eaven. “Kan wal wean, mer de wieze woerop, doar deugt gin driete van!” En dat ze dan zelf met niks betters komt.
A’w doar rekkening met mossen holden, geburen der helemoal niks. Dan stund allens stille. As alle zwartkiekers altied geliek hadden ehad, leupe wiej non nog in een bearenvel en mosse wiej met nen spear achter nen mammoet an um wat te etten te kriegen. Stelt oe es vuur dat iej in dee tied per ongelukke tiedens et reusteren van dat höarige mammoetvleis een händke zolt der op leuten vallen. Hoh wat smaken dat inenen lekker! Mer toch kömmen der nen hoop hellige stamgenoten op de achterste bene, want zo hadden wiej Echte Holbewoners dat nog nooit kloar emaakt! “Mer et is toch lekker?” Niks met te môken! Niejmoodse flantuten! Op de brandstapel met oe!
En dat de leu honderd joar later wier hellig wordt umdat een of anderen koezen strukelt en een stel siepelsnippers bie op et vleis löt vallen. “Vroger! Too atte vie tenminsten nog Echt Mammoetvleis®, met enkel een händke zolt!”
Mer wiej mut verdan. Et is een betjen net as dat glas wat halfvol is of half löag. Ik kieze der mer vuur um et as halfvol te zeen. “Mer wat as der dan ettik in zit?” Dat vernemme wiej dan wal wier. Met een strötjen ettik krie’j ’n moos lekkerder en de kleare better skone. En zegt non zelf, nen feinen rookworst is toch heel wat better as toa Mammoetvleis.
Martin ter Denge
