Eureka. Ik hebbe et lecht ezeen. Noa depe oaverpeinzing zin ik achter de readen at Twente der altied zo bekaaid ofkump op alle sportpodia. Wiej probeert et gewoon in de verkeerde heuke.
Max kan op Zandvoort nen eande plearen met ziene wage. Dat wil gewoon neet op onze boetenofse slingerpädte met knipgeater, heupe beestedrek en ummeweeide beume. Dee zint bedoold um met nen skoer drank in de hoed in ’n stikkeduustern oaverhen te laveren en noaderhande stoarke verhalen oaver te vertellen. Dat kö’w as de beste. As ze doar non es nen wedstried van heulden. In De Helaasheid der dingen van van Dimitri Verhulst leus ik al dat der ook wal boetenlandse concurrentie van kon kommen. Mer dat maakt et juust mooi. En dan he’w wier wat te trainen.
Sven kan lange ofstanden skaatsen op de gladte bane van Thialf. Netjes onderdak en met ne grote kearmachine den as em ieder glievken rap achter et gat an wier dichtestrik. Gin wonder at hee et bie et skaatsen altied zo good dut. Bie ons op de natuurvlakte van Riessen zin iej noa tweehonderd meter an ‘n anderen ende van ’n bunder. Kö’j noagoan wat een geklepperte vuur den täkkedroad dat gef a’j net eaven op snelheid warren. Dat zee’k den Sven neet redden. Mer wal op alle podia ‘n mooien kearl oethangen.
Woer as wiej et wal met zollen winnen: honderd meter platliggen. Doar is mien vaar altied kampioen in, zeg hee zelf. En mien vaar lög nooit. Dut hee ook alle zundage trainen. En een kabaal at hee der bie maakt. Toch zee ik der nooit skreeuwende krantenköppe oaver (snap ik wal, iej wilt em natuurlik neet wakker maken). Mer toch zol ik et vuur um wal es mooi vinden as der es in de krante stund van ‘TER DENGE LAPT ET EM WIER!’ en ‘TUKKENDE TUKKER TERECHTE TOPPER!’ Hee wint et nog met de ogene dichte. En dan nen foto der bie van et gezichte, van inspanning verwrungen op et kussen.
En um Poasken he’w ook nog et eierkulen en eierlopen. Met een hennenei op nen leppel een heel parcours ofleggen. Hen (haha) en wierumme. Mu’j noagoan wat ne konditie, wat ne kontrole, wat ne konsternoatie. En dan zo anskoeven bie den volgenden wedstried: et eieretten. Net as bie cricket kon zonnen wedstried wal nen helen dag doeren. En net as bie cricket vindt vuural de spöllers zelf et machtig mooi. Mie ducht.
En dan he’w der nog heel wat dee as zik nen slag in de rondte nöalt. Wat doot et zelfs in column-vorm. Ook dat is nen beker weard. Kort ezegd is Twente gewoon een land van kampioenen. A’j et mer wilt zeen.
Martin ter Denge
