In Riessen kan voetbalclub SV Excelsior ’31 never en nooit zoonder steun van het zakenleaven. Ze koopt oaveral deure spöllers vuur de hoofdmacht met groot geeld van oondernemmers. Ook Hockeyclub HCHR in Hoolten hef royale geeldscheters, net as SV Rijssen. Kreejt ginnen haan noar. Gebuurt in alle openheaid: op de websites en langs het veeld kö’j in sukela-letters leazen wee de kapitaalverstrekkers zeent. En het geet neet um klean-beer, want an de club-accommodaties mankeert niks an. Noa de wedstrieden spölt de oondernemmers doar heel geane de doarde helfte en aaltied met weenst.
Der zeent dreks nog völle mear verbaanden te leggen. In Riessen dut ’t CDA en de CU altied heel vreandelijke dinge vuur Excelsior; dee hebt doar nen hoop kiezers zitten. De VVD in Hoolten is HCHR geane ter wille. De PvdA Groen Links dut geane wat vuur Pand 11. Is det verkeerd? Ik geleuve der niks van. Zeker neet a’j der neet geheimzinnig oaver doot. Nen timmerman hef nooit gebrek an spiekers; mear gin meanske zal hardop zeggen det’e gapt.
Een poar wekke terugge heb ik alles wat Richard de Mos in ’n Haag ten laste is elegd duur een vergrootglas eleazen. Umda’k stoomp verwoonderd was op watvukke groonden het OM der met gangs is egoan, wol ik doar toen al nen column oaver schrieven. Ik wazze slim verontwaardigd. A’j nen ex-PVV’er op ’n bek weelt loaten goan, prima, mear doot het dan wal met klachten dee ’t hoolt sniedt. Ik wazze het hele geval al ’n betje vergetten, mear ofgelopen wekke kwam het bericht dat ’n rechter De Mos vriej hef esprökken. Dät gef toch wier niej vertrouwen in de onafhaankelijkheaid en ’t gezoond verstaand van de Nederlaandse rechtspraak.
Meineed, vaalsheaid in geschrifte…aln deksel worden De Mos verwetn. En ik weet wal, zo gaauw at de geeldbreefkes wappert, dan mut zelfs Inez Weski stevig in de schone stoan. Mear De Mos mag dan nen schoolmeaster wean, mear heelmoals gek zeent dee duur ’n regel neet. Hee jach in nen gewonen auto en woont in een gewoon hoes. At oondernemmers de club weelt sponsoren en a’w doar neet stiekem oaver doot, wat wi-j dan nog mear? Alleman weet – zeker seends Lubach – dat de Boer Burger Beweging fiks geeld en biejstand hef ekregen van de grote mengvoederindustrieën. Loat geworden.
At ze in Den Haag ruggegroat hebt, haalt ze De Mos gaaw wier in ’t College en goat ze dreks verdan woer ze toen ebleven zeent. Mer ik weet nit of dat in de polletiek zo logisch woarkt…
Gerrit Dannenberg
