As ne profvoetbalclub dikke sponsors hef, kan’e deure spöllers kopen. Dee club haalt völle peunten en speult op hoog niveau. Dat veende wiej ne kwaliteitsclub.
Mear vúúr de club zo vear is, mut’e zich bewiezen. Aanders stekt sponsors doar gin geeld in. Ze zeent nog ginne kwaliteitsclub met hoge scores, mear ze loat zeen dät ze op de goo weg zeent.
Kwaliteit is ook praktijk van alle dag in ’t oonderwies. Elk joar zee’w in de media complete liesten van de beste scholen en de beste leraren. Net zo as de beste oliebollen of de beste hearing. Iej woarkt oe ’n slag in de roondte en dan koomp der nen komkommerjournalist den al hef eschreven oawer de eikenprocessierups, de dreugte en de graancirkels. As mystery guest neamp hee een lesten hearing van de schale.
“Woch eaven, ik pakke ne nieje schale!” zeg een visboer.
– Nee, nee, doe mij die laatste maar.
En ’n volgenden dag stoa’j in het AD: “Slechtste haring dit jaar uit Twente.” Met het oervervelende riedeltje: raanzig, slap, slechte presentatie. Ook al heb iej nen completen moarktkroam boordevol friske vis.
As dat gin krang beeld beeld gef. En dan duur zonnen mystery guest. Oost-Duutse praktijken.
Scholen hebt gin vette sponsors, köant gin sterdocenten ankopen. Scholen mutten schimmige trucs oethalen met LC- en LD-salarisschalen. Zeldzame learkrachten wordt binnen-elokt met ne hoge salarisschale. Doar hef de schole der altied te weainig van. Dus krieg iej ne rotsfeer in oew team. Hef de schole nog learkrachten met harte vuur ’t vak; leraren dee ’t eisen stelt; dan deugt ook dat wier neet, want dan mu’j slecht presterenden leerlingen ook loaten zakken. Zo daag iej de leerlingen oet um te presteren. As schole zi-j dan nen goo schole, mear oew slagingspercentage is lege en iej stoat neet mear in de top-liestjes van de beste scholen van ’t joar.
Wiej weet allemoal dat het zo geet. Wiej zeent jums neet gek! Mear de media – wanhopig duur ’t verlees van abonnees – goat ‘r gewoon met verdan. Wiej wordt dood-egooid met series incidenten achter mekoar woe’j oe neet better van goat veulen. Dat maakt ontevreaden leu dee mekoar op de socials verbaal vlot vuur ’n bek howt.
En wiej pikt het ook nog! Ultra-nerveus reageren op de Bulgarenfraude en weeld um zich hen howen um de toeslagenaffaire op te lössen hef oons nen smak geeld ekost. Eerst mekoar good biejkuijern, good inleazen en oawerleggen hoe’w dät het beste hadden können anpakken. Doar mut ’t gewoon wier op-an, aanders wordt ’t nooit wier wat.
Gerrit Dannenberg
