‘Wee’j wat,’ dachten ik bie miezelven, ‘wee’j wat? Ik kieke es bie de NOS op et sportspul.’ En de NOS had metene wat te kauwen vuur mie. Een persondervroaging vuur bondskoodzj Louis van Gaal. Oaver wee of der wal en neet met meug noar et volgende toernooi zus of zo in de Sjempesdivisie of wat weet ik der van. Dzjordzjienjo van Dijk was te slap en doarumme mos he achter de geraniums. Of Lowietjen meanen of Dzjordzjienjo doar hellig oaver was, vreugen ze em. Veer minuten van mien leaven doeren dat. Toen had ik der alwier met egetten en edrunken. En an Van Gaal was good to zeen dat hee der etzelvde van meanen.
Hee lachen zik et kukident bloot um zovölle gedram en zea dat em dat gin driete interesseren. Misskien in wat andere wöörde, mer good, ’n bodskop köm oaver.
Iej zaggen dudelik dat et ne zwoare etappe (joajoa, anderen sport) was vuur Van Gaal. ‘Et is potdooksmie mer vootbal: Bie wet volwassene kearls dee’t as ponypeardjes met gember in ’t gat achter nen bal anhobbelt en doot as of dat et falderaldervuurnaamste is. Skei toch astoebleeft oet man.’ Hee smeet zik achteroaver in ’n stool, rollen met de ogene en heuf zinne handen op noar ’n hemmel in onskold.
Of der teare vootbalzieltjes ekwetst warren, was eagenlik de onderlinge vroage. Herr Von Galen bombarderen et allemoal plat. Hee is nog van ’n olden stempel. Hee kon wal oet Twente kommen. Wal köakeln en gin eier leggen, dat gung der bie em neet in. Dan goa’j gewoon in de soep, as et der op an kump. Der an met de lippe en anders nen trad onder ’t gat. Der op of gin vretten.
As troost vuur den zwoaren mentalen slag magt de neet-oetverkorenen dan een extra plakplaatjen op ’n oarm, ‘um of te sloeten dat ze oet et depe dal wierop eklummen zint’ of van dat soort zemmelderieje. Wat dan wier breed wörd oetemetten vuur de televisie woer as iej en ikke alle moanden belasting vuur betaalt.
En dee slappe zalverige minkukels en zöadstemmekes met öare deure kamera’s en opnameapparatuur en al dee andere zelfverkloarde kenners vuur de 17 miljoen TV-sköarme kiekt et dag in dag oet wier. Wat nen soap.
As de leu doar al noar kiekt, köant ze ook wal mear platte televisie maken. En dan heb ik et neet oaver nen plasma an de wande, mer gewoon sportjournaals in et Twents.
Slap inholdsloos nöalen kan in iedere sproake en hoo’j neet vuur te learen.
Martin ter Denge
