Verskrikkelik! Kearl en gin eande, ik zin mie kapot eskrukken! Ik zatte gewoon in miene sportiefste holding mien onskuldige zelf te wean op de banke, te wochten um vanoavend eaven lekker wat bie ’n Chinees te etten. Et meaken was onder et ziejeke, ik gebreuk de tied um nog eaven wat bie op de Nedersaksische Wikipedia te skrieven. Mien 995ste artikel, dat tikket mooi an. Letterlik. En dat allemoal kostenloos, oet leefde en umdat ieleu et allemoal verrekket.
Mer toen sleug et noodlot too. Meanen ik net dee hele donderieje in China met sukses te hebben eboycott, wör ik in een onbewaakt ogenblik oavervöllen! Et wör mie opedrungen! Onder ’n neuze drokt!
Ik was nog mer net gangs met et artikel oaver Guinea-Bissau, et land in ’n westeliken tip van Afrika, (in et Mandinka: ߖߌߣߍ ߺ ߓߌߛߊߥߏ߫) do as et gebuurden! Noe weet ik al van et gestamp van onze noabers hier in et hotel met oetzicht op Los Gigantes dat de wändkes froai dunne zint. Mer zo dunne, dat ha’k nooit edacht! Net terwiel a’k deed van 1.726.000 inwonners op ongevear 36.000 kilometer in et veerkant, was et raak. Skienboar zint de kniepekästkes van de tellevisies hier zo stoark dat ze dwars duur alle wanden hen stroalt.
Töt ’n lesten dag gung et good, hier op Tenerife. Wiej hebt de Teide umzeild, want wiej wusten wat vuur volk of doar op of kump. Dat gung dus al good. An ’n noordeande zi’w in de dörpe bleven, niks aparts ezeen. Et dörpken Tanque Bajo, de Tankenbarg van Tenerife met nen stikken dodenweg woer’j kold van wordt (met zo’n percentage kö’j oe net zo good direkt van nen klip ofsmieten), kömme wiej zonder problemen duur. Mer noe, op ’n eennoalesten dag, höw et mie steil vuur de plette vuur: de televisie sprung as vanzelf an en vuur a’k kon vordkieken warren der WIELRENNERS vuur. Een HEEL PELOTON!
Noe mu’j mer es in de archieven wat vuur trauma’s a’k doarvan hebbe. Mer ik kan oe vertellen: gillend as nen biggen en bölkend as ne hellige bolle sprung ik in de bene, klauwen noar de ofstandsbedening. Ik begun in et wilde vord um mie hen te sketen. Den rooien knop drukken in zowat duur de onderkante. Et zal mie neet verbazen dat ze der in Guinea-Bissau — doar zi’w hier hemelsbreed neet zowied vanof, noar verholding — op de stea wier nen stoatsgreep van kriegt. Den eersten en lesten president den as et doar de volle vief joar ambtstied volheuld was José Mário Vaz. Dat was al oetzunderlik.
Mer WIELRENNEN dus! Ik eise op de stea ne vergoding vuur de mentale schade. Vuur et hele Guinea-Bissau.
Martin ter Denge
