De Tour de France is gangs. De gemeenteroaden doot twee moand niks. Oorlog in Oekraïne of neet: de hele politiek geet op ’n heel leeg pitje. Gelukkig dät ‘r dan of en too nog nen hittegolf is, aanders krie’j de kraanten heelmoals neet vol.
Vuur digitale kraanten is dät gin probleem, want dan breng iej gewoon ne bladziede meender. He’j de kraante ook earder oet. Neet verkeerd in de vekaansie. Mear vuur de papieren kraanten is dät bliekboar völs te ingewikkeld. En wat ‘r dán gebuurt verwoondert miej alle joar wier mear. Ik leaze al heel lange TC Tubantia, want ik wil alns weten wat ‘r in dizze contreajen gebuurt. (Schoonwal: ook dät wordt stöadig meender, want het geet de leste joareh vuural oaver veroongeliekte leu dee lellik te passe zeent ekömmen met een of aandere oaverheaidsinstelling.) Mear miene oargernis wordt met elk niej zommer grötter. Eikenprocessieroepen, de dreugte met bosbraanden, nieje coronadreiging, wespenoaverlast, temet natuurlijk wier de ufo-cirkels in de roggeakkers… en dät kan ik allemoal nog billijken um de kraante met vol te kriegen. Zeent ook van dee onderwerpen dee’j zo oet köant wesseln met ‘n Stentor, het AD en het Deawenter Dagblad. Mear de ofgelopen wekke vernietigden Tubantia elk record met een groot verhaal oaver het snel ofkoelen van oewen auto as den een poar uur in de braandende zunne hef estoan. Ik dachen nog heel efkes: dät wil ik wal ‘s weten. Mear al rap zakten miene belangstelling putdeepe vot; een verslaggever köm verestig neet wieter as álle portierraams tegelieke löszetten en a’j een lös dak hebt, zet dät dan ook lös. En dit ofgewöagen advies worden beslötten met dit daverende slotakkoord: “Als de ergste hitte uit uw auto weg is, zet dán pas de airco aan, want dan is uw wagen sneller op temperatuur dan wanneer u de ramen niet eerst openzet.”
In de gloriedage van de papieren kraanten ha’j nog het vuurdeel dät nen hoop leu dizze onzin neet oonder ogen kregen op vekaansie. Mear tegenswoordig leaze viej op vekaansie oaweral op de wearelnd de digitale kraante. Doarumme is komkommertied hopeloos oolderwets. Loat de kraante mooie vekaansieverhalen brengen. Neet oaver dee eeuwige campinggasten dee al 30 joar op dezelfde camping stoat, mear oaver horeca dee goo zaken doot, soft-iesverkopers dee goold verdeent met bevröaren locht verkopen, plezerige bedrieven die juust in de zommertied verdan doot. Ik neume mer wat. Mear verlöst oons astbleef dreks van dee duurgezakte komkommer-zommer-shitvulling. Iej zoln der te völle van kriegn.
Gerrit Dannenberg
